Сёння, 14 мая, быў дадзены старт новаму у нашай краіне выпрабаванню для выпускнікоў - цэнтралізаванаму экзамену.
29 адзінаццацікласнікаў беларускамоўнай гімназіі № 2 г.Барысава прынялі ў ім удзел. Да ЦЭ нашы вучні падышлі з добрымі ведамі, бо гэтаму папярэднічала сур'ёзная падрыхтоўка: урокі, факультатыўныя і дадатковыя заняткі, самападрыхтоўка. ЦЭ - гэта не звычайны школьны экзамен, а адначасова пачатак уступнай кампаніі ў ВНУ нашай краіны.
120 тэставых хвілін праляцелі хутка. І вось экзамен здадзены.
Гімназісты з настаўнікам ужо паспелі абмеркаваць вынікі. Рабяты падзяліліся сваімі ўражаннямі і адзначылі, што "атмасфера была добразычлівая, частка "А" ў тэсце была складаней за частку "Б"", "гэта цікавы жыццёвы вопыт і незабыўныя эмоцыі ад дрыжачых рук і слёз радасці, што ты шмат чаго ведаеш"! "Дзе-нідзе памыліліся, але ў цэлым разлічваем на высокія балы" Арганізатары ў аўдыторыях былі вельмі добразычлівымі". Педагогі заўважылі, што арганізацыя ЦЭ на базе філіяла БНТУ "Барысаўскі дзяржаўны палітэхнічны каледж" была на самым высокім узроўні.