Будучыня нараджаецца сёння: у беларускамоўнай гімназіі адбылася ўрачыстая лінейка, прысвечаная Дню ведаў.
І верасень звонкім званочкам заўзята
Паклікаў дзяцей на чароўнае свята.
Дзе з квеценню астраў сябруюць банты,
Дзе будуць вучыцца мой сябра, і ты.
Сёння, у першы дзень верасня, на ўрачыстай лінейцы педагогі, вучні гімназіі, іх бацькі сабраліся ўсе разам, каб адзначыць пачатак новага навучальнага года. Несумненна: дзень ведаў – гэта новыя магчымасці, старт у будучыню, імкненне да новых гарызонтаў, спазнанняў і адкрыццяў! І сёння беларускамоўная гімназія, як і усе ўстановы нашай краіны, расчыніла дзверы для тых, хто вучыць і вучыцца, хто імкнецца да ведаў і хто вядзе да іх, для тых, за кім стаіць будучыня роднага краю і любімай Беларусі. Са словамі віншавання да прысутных звярнуўся дырэктар гімназіі Анатолій Станіслававіч Забароўскі, які цёпла павіншаваў усіх з пачаткам навучальнага года, пажадаў поспехаў у вучобе, цярпення, стараннасці, новых адкрыццяў, яркіх падзей, удачы і толькі выдатных адзнак. На лінейцы прысутнічалі ганаровыя госці - дырэктар ААТ "Барысаўскі завод агрэгатаў" Насевіч Павел Аляксандравіч і намеснік дырэктара Бурко Юрый Пятровіч, якія разам з вучнямі 11 класаў усім першакласнікам уручылі падарунак ад Прэзідэнта Рэспублікі Беларусь Аляксандра Рыгоравіча Лукашэнкі - кнігу "Беларусь - наша Радзіма".
Завяршылася ўрачыстая лінейка традыцыйным выкананнем гімна гімназіі, першым школьным званком і першым урокам, тэма якога «Эстафета пакаленняў: захоўваючы мінулае, ствараем будучыню». Менавіта эстафета пакаленняў мае сімвалічнае значэнне і азначае перадачу ведаў, вопыту, традыцый, каштоўнасцяў і дасягненняў ад аднаго пакалення да іншага. На адзіным уроку гаварылі аб захаванні традыцый, гістарычнай і працоўнай спадчыны нашай краіны. Пра тое, што нам перададзена нашымі продкамі, як шмат створана нашымі сучаснікамі і што нам трэба захаваць, прымножыць і перадаць нашым нашчадкам.
У добры шлях вам!
Хай настрой бадзеры
Крочыць з вамі побач па жыцці,
Каб выдатна, легка і з задорам
Перашкоды ўсе змаглі прайсці!